گئجه لر آغلارام سنه

سسیمه یوخدو سس وئره ن دانیش منیله فاطیمه

هارا گئدیم گئجئیله من، دانیش منیله فاطیمه      آدامسیزام آدامسیزام

وطن غریبی اولموشام اوره ک یانیر بو محنته

زماندن داریخمیشام یئتیبدی غم نهایته

بیری قاپینی آچمییر گله منیمله صحبته

ائویمه یوخ گلیب گئدن دانیش منیله فاطیمه         آدامسیزام آدامسیزام

اوزاقلادیب بئله منه غریب و آشنا اوزون

گزیر گوزوم بیرین گوره اونا دئییم اوره ک سوزون

منی گورنده دوندریر بو شهریده هامی اوزون

بو غم چتیندی هر ندن دانیش منیله فاطیمه        آدامسیزام آدامسیزام

کیم اولسا یاسلی، رسمیدیر گلر غریبه - قونشولار

وئررلر تسلیت اونا بیرآزجا قلبی رام اولار

دوشنده یادا نیسگیلین اوره ک ملالیلن دولار

یاسیوا اولمادی گلن دانیش منیله فاطیمه

گونوزلر اوخشاییر ائویم خزان چکیله گولشنه

اودور کی گون باتان چاغی گلیر بیر اوزگه غم منه

قارانلیق ائوده صبحه ده ک گئجه لر آغلارام سنه

گیلئیلی یم خزانیدن دانیش منیله فاطیمه

                                                                     سلیم موذن زاده